2016 жылғы 1 қазанда мектептің өзін-өзі басқару комитетінің ұйымдастыруымен мұғалімдер күніне арналған қызықты, ұмытылмас күн өтті.
Дәстүр бойынша ардагер ұстаздарды оқушылар мектеп фойесінде қошеметпен қарсы алып, гүл сыйлады.
Сол күні жақсы оқитын және олимпиадалық резервтегі оқушылар мұғалімдерінің орнына сабақ берді. Оқушылар комитетінің мүшелері әкімшілік қызметін де атқарды. Мұғалім болудың өте қиын екенін мойындап, оқушыларымыз ұстаздарына жылы лебіздерін жаудырды. Одан кейін түрлі тосын сыйлар күтті. Ұстаздарға ағылшын тілі сабағы, зияткерлік ойындар өткізілді. Үлкен үзілісте ретро музыка қойылып, оқушылар мұғалімдерін биге шақырды.
Мұғалімдер күніне арналған концертке мектептің зейнетке шыққан ардагер ұстаздары да шақырылды. Олардың қатарында математика пәнінен сабақ берген Қалдыбаева Ғалия Шарафиқызы, Әлиева Фатима Жұмағазықызы, Жанадилова Роза Жанадилқызы, физика пәнінің мұғалімдері болған Тынтаева Шира Байбекқызы, Бақынов Жәкен Орынғазыұлы, Қожекенова Айнагүл Сапайқызы, тарих пәнінен дәріс берген Досболатова Ұлбосын Досболатқызы, қазақ тілі мен әдебиеті пәнінің мұғалімі Дәулетова Роза Дәулетқызы, ағылшын тіліне үйреткен ұстаз Никитина Нина Петровна, орыс тілі мен әдебиетінің мұғалімдері Нұрсейітова Райхан Нұрмашқызы мен Сабурова Гүлшарбан Қамалбайқызы болды. Г.Қ. Сабурова қазіргі таңда «Келешек-РФММ» мектебінің директоры қызметін атқарады.
Мектеп төрінде өткен кездесуде ардагер ұстаздар оқушылары, мектеп өмірі жайлы жылы естеліктерімен бөлісті, мектеп қабырғасындағы қызықты сәттерді еске алды. Олардың бір кездегі оқушыларының бірі – «РФММ» КеАҚ басқарма төрағасы Баеков Ербол Сейітұлы. Басқарма төрағасының орынбасары Долаев Архат Садырбайұлы, Шынасылова Сәуле Сыздыққызы, Қошанова Рабиға Игенбекқызы, Турагелдиева Шолпан Әмреқызы, тағы да басқа да мұғалімдер – РФММ түлектері.
Ардагерлер атынан Әлиева Фатима Жұмағазықызы барша қауымға батасын берді.
Сонымен бірге мектепке жаңадан келген және жас мұғалімдерге де қошемет көрсетілді. Оларды сахнаға шақырып, гүл шоқтары берілді.
Кездесу барысында «Республикалық физика-математика мектебі»
коммерциялық емес акционерлік қоғамының басқарма төрағасы Баеков Ербол Сейітұлы барлық ұстазға алғысын білдіріп, төл мерекесімен құттықтады.
